Saakay barakac xoogan ayaa  ka socdo qeybo ka mid ah Xaafadaha Degmooyinka Waqooyiga Magaalada Muqdisho halkaasi oo ay shalay ku dagaalamen Ciidamada Dwoalda iyo Xarakada Mujaahidiinta Al-shabab .

Dagaaladii shalay ka dhacay degmooyinka Waqooyiga Magaalada Muqdisho ayaa sababay dhimashada in ka badan 20 qof iyo dhaawaca ku dhawaad 67 kale oo dhammaan dad shacab ahaayeen kuwaasoo madaafiic kula habsadeen xaafadahooda.

Dadka ku nafta waayay madaafiicdaasi waxaa ka mid ah Qoys ka koobnaa 5 qof kuwaas oo Madfac kula habsaday xaafada Juungal Degmada Yaaqshiid ee Magaalada Muqdisho.

Goobaha laga raaco gaadiidka BL-ka waxaa lagu arkayaa qoysas aad u fara badan oo ka barakacayaan xaafadahooda, kadib saamayn culus oo ay ku yeesheen dagaaladii iyo duqeymihii arxan darada ahayd ee shalay ka dhacday degmooyinka Waqooyiga Muqdisho.

Inta badan dagaalada iyo madaafiicda arxandarada ah ee ka dhaca degmooyinka Gobolka Banaadir waxay sababaan dhimashada iyo dhaawaca dadka shacabka ah ee aan ku raadka lahayn dagaalada u dhaxeeya Dowladda KMG, AMISOM iyo xoogaga ka soo horjeeda oo isku hayaan gacan ku heynta Degmooyinka Gobolka Banaadir.